-Borovpi: Gasper Crasto...15.10.2016
This article features in the October 2016 issue of Goa’s Monthly Konkani Magazine – Gulab.)
Football ani songit Goenkaranchea rogtantuch asa, oxem mhonnlelem asa. Hachem karann, football ani songit adinch than Goenkaranchi sonskrutai.
Kuwait xharant India-chem football cholta tantun khub Goenkarancho and Goenche pongddancho aspav asa. Goenche zaite pongodd, India-chem football choloupak fattlim kitlinch vorsam aplo sohokar ani adhar diit aileat.
India-chea pongddam modem, football-a mollar Kerala ani Goenche pongodd ekdom chokmoktat. Goenkar pongddanim khub ‘tournament’ ani inamam jikhon nanv dovorlam.
United Goans Centre, 1976 vorsa ghoddun haddlolo ho pongodd, soglea India-che ‘club’-am poros porno pongodd aiz sumar 40 vorsam football-achea mollar misoll asa. Football-a bhair United Goans pongddan zaite amche Goenkar bhavank aplo adhar dil’lo asa ani azunui ditat.
1979 vorsa, United Goans zaun aslo poilo India-cho club Kuwaitchea adlea famad ‘Soor’ moidonar ‘League-cum-knockout’ spordha ghoddun haddunk. Tea tempar, 14 pongddanim bhag ghetlolo oxem itihias sangta.
AVC-Kuwait, Curtorcares United, Kuwait Goan Association toxech Kuwait xharant Goenkaram modem famad,1979 sthaplolo Goan Overseas Association (G.O.A) vo ‘GOA Maroons', he kaim pongodd fattlim sabar vorsam Kuwait-ant porzolltat.
K.I.F.F ANI J.P.D’MELLO TROPHY
1984 vorsa sthaploli Kuwait Indian Football Federation (K.I.F.F.), hea Kuwaitchea desant football-acho odhikar samballta ani football choloita.
India-che sabar ‘State’-iche khellgoddi sukrarache-sukrara moidanar disti poddtat.
Kuwaitche gormek ani sabar dusre karannak lagon choddxeo ‘game-eo’ sokallcheo khelloitat.
Soro, ‘gambling’ ani ‘entertaintment’ naslelea Kuwait-che oslea ganvant, tornatte bhurgeank football zaun asa ek bhes boro ‘passtime’ ani ‘passion’.
Fattlim sabar vorsam J.P.D’Mello 11-aside KIFF League chodduch loukik zal’li asa. Akhem voros bhor cholteli hi ‘league’ thondaiechea disanim 2°C itle pasun ‘temperature’-an, zalear gormechea disanim 50°C voir pasun gormen zata.
Sorgest Shri Jerome Pascoal D’Mello (J.P mhonnlear chodd famad) hachea nanvan hi League cholta.
J.P zaun aslo adlo FIFA ‘referee’, ani Asian Football Confederation Referees Committee-cho tosoch Bombay Referees' Association-ancho vangddi. Poilich K.I.F.F ghoddun haddunk to mull vangddi aslo. Tachi iad KIFF federation-an aiz pasun jivi dovorlea.
Mhonntat India-che bhair osli ‘Indian league’ anik khoinchea-i desant zainam mhonn. League-che bhair anik 11-aside ani 7-aside khellancheo spordha zatat.
KIFF LEAGUE-N BHAG GHEVPI PONGODD
Protek vorsa chodant-chodd (on an average) 16 team-incho aspav astalo. Punn hea vorsa thodde club fattim bosleat ani fokot 13 pongodd ‘register’ zaleat.
Hea vorsak Federation-ant aspav naslele famad pongodd mhonnlear ‘record’ 7 pautti KIFF League jikhnar Navelim.
2012 vorsa Navelim KIFF League-che ostad ani eka tempar 11 khellgoddi khud aple Navelim ganvche ghalun khelloupi pongodd. 25 vorsam odik voir ho pongodd Kuwait xharant boroch loukik zal’lo. Navelim-cho pongodd fattim ghetlolo polloun zaite zann dukhi zaleat.
Dusro ek famad ‘club’ hea vorsa bond poddla to zaun asa Mangalore ‘oriented’ club Rising Stars. Sumar 35 vorsam choloilea uprant hea oznadik pongddan hea vorsa aplem-i bixannem kelem.
Hachea poilim Kuwait-ant famad zal’le Goenkaranche pongodd bond poddleat te zaun asat 1979 vorsa sthaplolo Apache vo Santos Football Club, 1992 sthapith kel’lo CRC Chinchinim, ani zaite ekttaim ravon choloitelea Goenkar ixttancho pongodd -United Friends Club.
Khellgoddeancho ‘demand’ anik pongodd choloupacho vaddtolo khorch, hem vhoddlean vhoddlem karann he sogle nanvloukik ‘club’ bond poddonk , hantun konnachoch dubau nam.
Hea vorsache bhag ghevpi India-che pongddam modem Goenche pongodd zaun asat: AVC Sports & Cultural Association, Curtorcares United, Goa Maroons, Kuwait Goan Association, Santos United, Skynet Miracles ani United Goans Centre.
Her sogle pongodd Keralache ani Don Bosco Oratory (Mumbai-cho).
NOVO PRESIDENT ANI KIFF SEASON 2016~17
Hea vorsache Kuwait Indian Football Federation (KIFF) fuddari Committee-in (Managing Committee), Cavellossim ganvcho bab Domnic Pereira Odheokx mhonn nivddon aila.
Fattlea ‘season’-ant bab Domnic Sports Secretary mhonn vavurla, ani hachea poilim, khub vorsam sabar club-ank to ‘defender’ mhonn khevla.
Hea season’ache KIFF-ache committee-in bab Rosario Colaco (Raia ganvcho) – Sports Secretary, Claro Fernandes – Asst. Sports Secretary ani Rafael Rodrigues (Margao-Maddel) Executive Member) hea Goenkaranchi-i venchnnuk zal’li asa.
Septembrachea mhoineache 16 tarkher novea season-achi survat zali. Survateche dobajea somoiar bab Merwyn Franco ‘Khas Soiro’ mhonn hajir asle zalear manache soire mhonn bab Lawry Pinto, Fidelis Fernandes, Nicolas Rebello, Glen D’Souza, Carmo Santos, Cajetan de Sanvordem, bab Domnic Araujo, adi, hajir asle.
Survatechi Ceremony-chem sutrosoncholon bai Penny Rebello ani Gasper Crasto hannim kelem.
ABOUT THE WRITER:
Gasper Crasto is a former Salgaocar player based in Kuwait.